दाऊतपूरच्या विद्यार्थ्यांचा शिक्षणासाठी सात किलोमिटर चालत प्रवास...

गावापर्यंत बस सोडण्याची बाळासाहेब सुभेदार यांची मागणी  उस्मानाबाद-   उस्मानाबाद तालुक्यातील दाऊतपूरच्या विद्यार्थ्यांचा शिक्षणासाठी सात किलो...

गावापर्यंत बस सोडण्याची बाळासाहेब सुभेदार यांची मागणी 

उस्मानाबाद-  उस्मानाबाद तालुक्यातील दाऊतपूरच्या विद्यार्थ्यांचा शिक्षणासाठी सात किलोमिटर चालत प्रवास करावा लागत आहे. गावापर्यंत बस सोडण्याची मागणी आरटीआय कार्यकर्ते बाळासाहेब सुभेदार यांनी केली आहे. 

विद्यार्थ्यांच्या प्रवासाची होणारी गैरसोय थांबवून उस्मानाबाद आगारातून सुरळीत बस सेवा सुरू करण्यात यावी, या मागणीचे निवेदन जिल्हाधिकाऱ्यांना देण्यात आले. उस्मानाबाद आगारातून काजळा, दाऊतपुर,इर्ला,भंडारवाडी, टाकळी मार्गे येवती या मार्गे नियमित धावणारी बस सोडण्यासाठी हे निवेदन देण्यात आले आहे. 

सदर बस सायंकाळी साडेसात वाजता उस्मानाबाद येथून निघते आहे, त्यानंतर येवती येथे मुक्कामी थांबून सकाळी 6 वाजण्याच्या दरम्यान याच मार्गे उस्मानाबाद आगारात दाखल होते.  या बसने परिसरातील सर्व विद्यार्थी शिक्षणासाठी उस्मानाबाद येथे येतात मात्र त्यानंतर शाळा कॉलेज सुटल्यानंतर दुपारी घरी जाण्यासाठी या विद्यार्थ्यांना कुठलेही वाहन,बस उपलब्ध नाही. त्यामुळे दाऊतपुर गावातील विद्यार्थी इतर मार्गे जाणाऱ्या बसचा वापर करून जातात .मात्र चिखली पाठीवरून यांना पायी चालत प्रवास करत घर गाठावे लागते आहे. 

चिखली पाटी ते दाऊतपुर हे अंतर साधारणपणे सात किलोमीटरचे असून चालत प्रवास केल्याने या गावातील विद्यार्थी थकून जात आहेत.  त्यामुळे याप्रकरणी उस्मानाबाद आगारप्रमुख शिंदे यांना विद्यार्थ्यांच्या प्रवासाची सोय करावी, अशी विनंती केली मात्र अद्याप कुठलीही दखल घेतली नाही,  त्यामुळे जिल्हाधिकारी यांनी लक्ष घालून उस्मानाबाद आगारातुन दुपारी 12:30 वाजण्याच्या सुमारास सुटणारी सांजा,सारोळा, चिखली चौरस्ता,कामेगाव, सांगवी, समुद्रवाणी, लासोना, घुगी, नितळी मार्गे कोंडला जाणारी गाडी ही दाऊतपुर मार्गे सांगवी असा बदल करण्यात यावा अशी मागणी निवेदनाद्वारे करण्यात आली आहे.  या निवेदनावर माहिती अधिकार कार्यकर्ते बाळासाहेब सुभेदार यांच्यासह विद्यार्थी अजित लोखंडे,आकाश भांगे,किरण नरटे,अभिजित थोरात यांच्या सह अन्य विद्यार्थ्यांच्या स्वाक्षऱ्या आहेत.